ભરૂચ23 મિનિટ પહેલા
- કૉપી લિંક
જંબુસરમાં ગટરોના તૂટેલા સ્લેબના કારણે બે ગાયો ગટરમાં ખાબકી જવાની ઘટના બાદ એક વૃદ્ધ ગટરમાં ખાબકતા પાલિકાના અંધેર વહીવટ સામે પ્રજામાં ભારે આક્રોશ ફેલાઈ ગયો છે. જંબુસર પાલિકા તંત્ર સામે લોકોમાં રોષ ભભૂકી ઉઠ્યો છે. રસ્તાની બાજુમાં આવેલી ગટરોના સ્લેબ તૂટેલા હોય લોકો અને પશુઓ માટે જીવના જોખમ સમાન બની રહી છે. જંબુસર તાડિયા હનુમાન પાસે ગટરના સ્લેબ કેટલીક જગ્યાએથી તૂટેલા હોય પશુઓ, સ્થાનિકો, રાહદારી, વાહનચાલકો અને બાળકો પર અકસ્માતનું જોખમ વર્તાઈ રહ્યું છે.
રોડને અડીને આવેલી ડ્રેનેજના તૂટેલા સ્લેબમાં વૃદ્ધ પડી જતા તેને બૂમો પાડતા આજુબાજુના રહીશોએ દોડી આવી બહાર કાઢ્યા હતા. ગટરમાં ખાબકવાના કારણે વૃદ્ધને નાની મોટી ઇજાઓ પહોચવા સાથે અત્યંત દુર્ગન્ધ મારતી ગંદકીનો પણ પાલિકાના વાંકે સામનો કરવો પડ્યો હતો.
ઘટના બાદ સ્થાનિકોમાં પાલિકા સામે તીવ્ર રોષ જોવા મળ્યો હતો. સ્થાનિકોએ પાલિકા સામે રોષ વ્યકત કરતા ઉભરો ઠાલવ્યો હતો કે, ખુલ્લી ગટર માટે વારંવાર નગર પાલિકાના સત્તાધીસો રજુઆત કરી છે. થોડા દિવસો અગાઉ 2 ગાય પણ ગટરમા પડી હતી. તેમ છતાં કોઈ ધ્યાન ન આપતા આજે વૃદ્ધ પડી જવાની ઘટના બની છે. ગતરોના તૂટેલા સ્લેબને દુરસ્ત કરવા સ્થાનિકોએ માંગ કરી છે.
