આણંદ10 મિનિટ પહેલા
- કૉપી લિંક
આણંદના લાંભવેલ ટી- પોઇન્ટ આગળ ઇન્દિરા ગાંધી સ્ટેચ્યુ પોઇન્ટ નજીક ગાડીમાં બેઠેલા ઈસમે પોલીસ જવાનના શર્ટનો કોલર પકડી ડીએસપી આઈજી ડીજી તથા ગાંધીનગર સુધી રાજકારણીઓ બધા મને ઓળખે છે. તેમ કહી તારી વર્દી એક મિનિટમાં ઉતારી દઈશ હવે પછી મારી ગાડી રોકવાની કોશિશ કરીશ તો તારા ઉપર ગાડી ચડાવી દઈ જાનથી મારી નાંખવાની ધમકી આપ્યાના બનાની ફરિયાદ આણંદ શહેર પોલીસ મથકે નોંધાઇ છે.
આણંદ શહેરના લાંભવેલ ટી- પોઇન્ટ આગળ નજીક 1લી એપ્રિલના રાત્રિના સમયે પોલીસ કોન્સ્ટેબલ સમીરખાન ઈકબાલ ખાન શેખ પોતાની ફરજ બજાવી રહ્યો હતો. તે દરમિયાન એસયુવી ગાડી નંબર જી,જે,૨૩ બી,ડી, ૨૨૦૮ આવી ચઢતા કોન્સ્ટેબલ સમીરખાન શેખે ઈશારો કરી ગાડી ઉભી રાખી હતી. પરંતુ ગાડી ચાલકે પોતાની ગાડી પુરઝડપે લાંભવેલ રોડ તરફ હંકારી મુકી હતી. બાદમાં પોલીસે ફિલ્મીઢબે પીછો કરી ગાડીને ઝડપી પાડી હતી. તે દરમિયાન ગાડીમાં બેઠેલા શખસે પોતાનું નામ યોગેશ પટેલ હોવાનું જણાવીને પોલીસ જવાન સમીરખાનને તું ગાડી રોકવા વાળો કોણ છે ? તું મને ઓળખતો નથી. તું અહીંથી જતો રહે મારી ઉપર સુધી લાગવગ છે. તેમ કહીને ગાડીમાંથી નીચે ઉતરી પોલીસ જવાનને અપશબ્દ બોલવાનું શરૂ કરી દીધું હતું. બાદમાં પોલીસ જવાન સમીરખાનના શર્ટનો કોલર પકડીને મને ડીએસપી, આઇજી ડીજી તથા ગાંધીનગર સુધી રાજકારણીઓ બધા ઓળખે છે. તારી વર્દી એક મિનિટમાં ઉતારી દઈશ તેવી ધમકીઓ આપી હતી. અને હવે પછી મારી ગાડી રોકવાની કોશિશ કરીશ તો તારા ઉપર ગાડી ચડાવી દઈ તને જાનથી મારી નાખીશ તેવી ધમકીઓ ત્યાંથી જતો રહ્યો હતો.
બાદમાં ફરીવાર પાછળથી એક બ્લેક કલરની બીએમડબલ્યુ ગાડી જેના નંબર પ્લેટ ઉપર એપ્લાઈ ફોર રજીસ્ટ્રેશન લખેલ હતું. તેનો ચાલક યોગેશ પટેલ હતો. જે ઇન્દિરા ગાંધી સ્ટેચ્યુ પોઇન્ટ ઉપર આવીને પોલીસ જવાન સમીરખાનને ધમકી આપીને તારી વર્દી એક મિનિટમાં ઉતારી દઈશ મને ગાંધીનગર સુધી બધા રાજકારણીઓ ઓળખે છે. હવે પછી મારું નામ લખી રાખજે હું યોગેશ પટેલ છું. યોગેશ પટેલ. હવે પછી મારી ગાડી રોકવાની હિંમત ના કરતો તેમ કહી ગમે તેમ ગાળો બોલી જાનથી મારી નાખવાની ધમકી આપી ગાડીમાં બેસીને નાસી ગયાં હતા.
આ અંગે પોલીસ કોન્સ્ટેબલ સમીરખાન શેખે આણંદ શહેર પોલીસ મથકે ફરિયાદ નોંધાવતાં પોલીસે એસ.યુ.વી. ગાડી ના ચાલક તથા અન્ય એસ.યુ.વી. ગાડીના બેઠેલ યોગેશ પટેલ વિરુદ્ધ ગુનો નોંધીને આગળની કાર્યવાહી હાથ ધરી છે.
