ગાંધીનગર19 મિનિટ પહેલા
- કૉપી લિંક
ગાંધીનગરના ટીંટોડા ગામે રેલવે ફાટક નજીક રોડ ઉપર કલોલના 37 વર્ષીય યુવાને પોતાનું બાઇક પૂરપાટ ઝડપે અને ગફલતભરી રીતે હંકારતા બાઈક સ્લીપ ખાઈ ગયું હતું. અકસ્માતમાં ગંભીર રીતે ઘાયલ યુવાનને શરીરે ગંભીર ઈજાઓ થવાથી અમદાવાદ સિવિલ હોસ્પિટલમાં ટૂંકી સારવાર દરમિયાન મોત નિપજતા પેથાપુર પોલીસે ગુનો નોંધી વધુ કાનૂની કાર્યવાહી હાથ ધરી છે.
કલોલ રેલવે પૂર્વ ઘનશ્યામનગર સોસાયટીમાં રહેતા બિપીનચંદ્ર કચરાભાઇ જાદવ પાટણ ખાતેની પ્રાથમિક શાળામાં શિક્ષક તરીકે નોકરી કરે છે. જ્યારે તેમનો નાનો ભાઇ કેતનકુમાર કચરાભાઇ જાદવ તેના પરિવાર સાથે કલોલ ખાતે રહેતો હતો.
ગઇકાલ શનિવારની રાત્રિના સાડા આઠેક વાગે બિપીનચંદ્ર ઘરે હાજર હતા. તે વખતે તેમની નાની બહેને ફોન કરીને જાણ કરી હતી કે, કેતનને એક્સિડેન્ટ થયું છે. જેને ગાંધીનગર સિવિલથી અમદાવાદ સિવિલ સારવાર અર્થે લઈ જઈએ છે. જેનાં પગલે બિપીનચંદ્ર તાત્કાલિક અમદાવાદ સિવિલ દોડી ગયા હતા. જ્યાં કેતનને ટ્રોમા સેન્ટરમાં દાખલ કરાયો હતો. અને તેને ગંભીર ઈજાઓ થવાથી નાક અને કાન માંથી લોહી વહી રહ્યું હતું. તેમજ તે બેભાન અવસ્થામાં હોવાનું જાણવા મળ્યું હતું.
આથી બિપીનભાઈએ પરિવારજનોને અકસ્માત અંગે પૂછતાં વધુમાં જાણવા મળેલું કે,ગઈકાલે સવારના દશેક વાગે કિરણ કામ અર્થે બાઈક લઈને ગાંધીનગર ગયો હતો. અને ત્યાંથી પરત ઘરે ફરતી વેળાએ ટીંટોડા ગામ રેલ્વે ફાટક નજીક પહોચતા બાઈક સ્લીપ ખાઈ ગયું હતું. જે બાદ સારવાર અર્થે અમદાવાદ સિવિલ લાવવામાં આવ્યો હતો. ત્યારે સારવાર દરમ્યાન અચાનક તબિયત વધુ લથડતા ફરજ પરના તબીબે કેતનને મૃત જાહેર કર્યો હતો.