- આજે નીતિ આયોગની યોજાશે બેઠક
- PM મોદીની અધ્યક્ષતામાં યોજાશે બેઠક
- બિહારના મુખ્યમંત્રી નીતિશ કુમાર નીતિ આયોગની આ બેઠકમાં ભાગ લેશે નહીં
વડાપ્રધાન નરેન્દ્ર મોદી આજે નીતિ આયોગની ગવર્નિંગ કાઉન્સિલની સાતમી બેઠકની (Governing Council Meeting) અધ્યક્ષતા કરશે. બિહારના મુખ્યમંત્રી નીતિશ કુમાર નીતિ આયોગની આ બેઠકમાં ભાગ લેશે નહીં. તેમણે બેઠકમાં ભાગ ન લેવાનો નિર્ણય કર્યો છે. તેલંગાણાના CM કે ચંદ્રશેખર રાવ (KCR )એ પણ આ બેઠકનો બહિષ્કાર કર્યો છે. પીએમ મોદી પાકથી લઈને શિક્ષણ સહિત ઘણાં વિવિધ વિષયો પર ચર્ચા કરશે. નીતિ આયોગના ઉપાધ્યક્ષ સાંજે 7 વાગ્યે પ્રેસ કોન્ફરન્સ કરશે.
ભારત તેની આઝાદીની 75મી વર્ષગાંઠની ઉજવણી કરી રહ્યું છે. ભારતના નિર્માણની દિશામાં આજે નીતિ આયોગની ગવર્નિંગ કાઉન્સિલની 7મી બેઠક યોજાઈ રહી છે. વડાપ્રધાન નરેન્દ્ર મોદી નવી દિલ્હીમાં રાષ્ટ્રપતિ ભવન કલ્ચરલ સેન્ટર ખાતે આ સાતમી બેઠકની અધ્યક્ષતા કરશે.
કયા ક્યા વિષય પર ચર્ચા થશે?
નીતિ આયોગની ગવર્નિંગ કાઉન્સિલની આ બેઠકનો એજન્ડા પાક, તેલીબિયાં કઠોળ અને કૃષિ-સમુદાયના વૈવિધ્યકરણની બાબતમાં આત્મનિર્ભરતા હાંસલ કરવાનો છે. આ ઉપરાંત, રાષ્ટ્રીય શિક્ષણ નીતિ – શાળા શિક્ષણનું અમલીકરણ, રાષ્ટ્રીય શિક્ષણ નીતિ – ઉચ્ચ શિક્ષણ અને શહેરી વહીવટનું અમલીકરણ શામેલ છે. આ બેઠકની તૈયારીના ભાગરૂપે, જૂન 2022માં ધર્મશાળામાં વિવિધ રાજ્યોના મુખ્ય સચિવોની રાષ્ટ્રીય પરિષદનું આયોજન કરવામાં આવ્યું હતું, જે કેન્દ્ર અને રાજ્યોની છ મહિનાની મહેનતનું પરિણામ હતું.
નીતિ આયોગની (NITI Aayog) મહત્ત્વની બેઠક
રાજ્યોના મુખ્ય સચિવોની પરિષદની અધ્યક્ષતા વડાપ્રધાન દ્વારા કરવામાં આવી હતી અને તેમાં તમામ રાજ્યો અને કેન્દ્રશાસિત પ્રદેશોના મુખ્ય સચિવો તેમજ કેન્દ્ર અને રાજ્ય સરકારોના વરિષ્ઠ અધિકારીઓએ ભાગ લીધો હતો. ગવર્નિંગ કાઉન્સિલની સાતમી બેઠક તમામ વિષયો પર રોડમેપ અને પરિણામ આધારિત કાર્ય યોજનાને અંતિમ સ્વરૂપ આપવાનો પ્રયાસ કરશે. જુલાઈ 2019 પછી ગવર્નિંગ કાઉન્સિલની આ પ્રથમ સીધી બેઠક હશે. કોવિડ-19 રોગચાળાની પૃષ્ઠભૂમિમાં આપણે અમૃત સમયગાળામાં પ્રવેશી રહ્યા છીએ અને આવતા વર્ષે G20 પ્રેસિડન્સી અને શિખર સંમેલનનું આયોજન ભારત કરી રહ્યું છે તેના સંદર્ભમાં આ બેઠક વિશેષ મહત્ત્વની થઇ શકે છે.
બેઠકમાં કોણ હાજર રહેશે
નીતિ આયોગની ગવર્નિંગ કાઉન્સિલની આ બેઠક આંતર-પ્રાદેશિક, આંતર-વિભાગીય અને સંઘીય મુદ્દાઓ પર ચર્ચા કરવા માટે એક પ્લેટફોર્મ પૂરું પાડે છે. જેમાં દેશના વડાપ્રધાન ઉપરાંત તમામ રાજ્યો અને કેન્દ્રશાસિત પ્રદેશોના મુખ્યમંત્રીઓ સામેલ છે. અન્ય કેન્દ્રશાસિત પ્રદેશોના લેફ્ટનન્ટ ગવર્નરો, ભૂતપૂર્વ અધિકારીઓ, નીતિ આયોગના ઉપાધ્યક્ષ અને નીતિ આયોગના સંપૂર્ણ સમયના સભ્યો ભાગ લે છે. આ સાથે કેન્દ્રીય મંત્રીઓને ખાસ આમંત્રિત સભ્યો તરીકે સામેલ કરવામાં આવ્યા છે. તે કેન્દ્ર સરકાર અને રાજ્ય સરકારો વચ્ચે પરામર્શ માટે સૌથી મહત્વપૂર્ણ મંચ પુરૂ પાડે છે.