Surat: નવી સિવિલ હોસ્પિટલમાંથી બે દિવસ પહેલા નવજાત બાળક ચોરી થયુ હોવાની ફરિયાદ મળી હતી. હોસ્પિટલના સીસીટીવીમાં એક મહિલા બાળકને ઉઠાવી જતી નજરે પડી હતી. ત્યારબાદ પોલીસે સીસીટીવી ફુટેજને આધારે યુપીની રહેવાસી મહિલાને ઝડપી પાડી બાળકને તેના માતાપિતાને સોંપ્યુ હતુ.
બાળક ચોરી કરનાર મહિલા
સુરત સિવિલમાંથી નવજાત બાળકની ચોરી કરનાર મહિલા સકંજામાં આવી ગઈ છે. ખટોદરા પોલીસ અને જિલ્લા પોલીસની મદદથી બાળક ચોરી કરનાર મહિલાને ઝડપી લેવામાં આવી છે. પલસાણાના ઝોલવા ગામમાંથાી આ મહિલા મળી આવી હતી. ઉત્તરપ્રદેશની રહેવાસી અંકિતા નામની મહિલા સુરત સિવિલમાંથી નવજાત બાળકની ચોરી કરી ફરાર થઈ ગઈ હતી. પોતાનું કોઈ બાળક ન હોવાથી મહિલાએ સિવિલમાંથી નવજાતને ઉઠાવી ફરાર થઈ હતી.
સિવિલમાંથી નવજાતને ઉઠાવી જનાર મહિલા ઝડપાઈ
સમગ્ર ઘટનાની વિગત અનુસાર સિવિલ હોસ્પિટલમાંથી બે દિવસ પહેલા એક મહિલાએ નવજાતને જન્મ આપ્યો હતો. ત્યારબાદ બાળકને પેટીમાં રાખવામાં આવ્યુ હતુ. તે દરમિયાન પલસાણામાં રહેતી યુપીની મહિલાએ નવી સિવિલ હોસ્પિટલમાંથી નવજાત બાળકની ચોરી કરી ફરાર થઈ ગઈ હતી. ફરજ પરના તબીબો અને હોસ્પિટલ સ્ટાફને ઘટનાની જાણ થતા જ તાત્કાલિક બાળકની શોધખોળ શરૂ કરાઈ હતી. હોસ્પિટલના સીસીટીવી કેમેરા ચેક કર્યા બાદ આ મહિલા બાળકને લઈ જતી જોવા મળી હતી. જેમાં પીળા કલરની સાડીમાં મહિલા બાળકને લઈ જતી જોવા મળી હતી.
પલસાણા અને ખટોદરા પોલીસની મદદથી મહિલા ઝડપાઈ
સીસીટીવી ફુટેજના આધારે ખડોદરા પોલીસે ગુનો નોંધી તપાસ હાથ ધરી હતી. જેમાં પલસાણા પોલીસ અને ખટોદરા પોલીસે સંયુક્ત શોધખોળ હાથ ધરી હતી. જેમાં બાળક સાથે મહિલાને ઝડપી લેવામાં આવી હતી. ખટોદરા પોલીસે બાળકનો કબ્જો લઈ માતાપિતાને સોંપ્યુ હતુ. જ્યારે બાળક ચોરી કરનાર મહિલાની અટકાયત કરી વધુ તપાસ હાથ ધરવામાં આવી છે.
ઈનપુટ ક્રેડિટ- બલદેવ સુથાર- સુરત
