રાજકોટ26 મિનિટ પહેલા
- કૉપી લિંક
પ્રતીકાત્મક તસવીર
રાજકોટમાં જામનગર રોડ, નાગેશ્વરમાં આવેલા એપલ ગ્રીન એપાર્ટમેન્ટમાં રહેતા અંકિત પ્રકાશભાઇ દાવડા નામના યુવાને સહકારનગર મેઇન રોડ પર આવેલી તેની એ.ડી.એન્ટરપ્રાઇઝ નામની ઓફિસમાં દોરી બાંધી ગળાફાંસો ખાઇ આપઘાત કરી લીધો હતો. બનાવની પરિવારજનો ખબર પડતા તુરંત ત્યાં દોડી ગયા હતા અને ભક્તિનગર પોલીસને જાણ કરી હતી. પરિવારજનોની પૂછપરછમાં અંકિત માતા-પિતાનો એકનો એક દીકરો હતો. તેના ચાર વર્ષ પહેલા લગ્ન થયા હતા. સંતાનમાં ચાર મહિનાની દીકરી છે. અંકિત બાંધકામની સાઇટ પર વપરાતા કેમિકલનો વેપાર કરતો હતો. ગઇકાલે મોડે સુધી પરત ઘરે નહિ આવતા ફોન કર્યો હતો, પરંતુ ફોન રિસીવ નહિ થતા ઓફિસ જઇ તપાસ કરતા અંકિતે આપઘાત કરી લીધાની ખબર પડી હોવાનું જણાવ્યું છે.
મિત્રના લગ્નમાં કેટરર્સ સાથે બબાલ થતા યુવક પર જીવલેણ હુમલો
રાજકોટ શહેરમાં મારામારીના ત્રણ બનાવ પ્રકાશમાં આવ્યા છે. પ્રથમ બનાવમાં ગંજીવાડા-52માં રહેતા મહેશ મુળજીભાઇ મકવાણા નામના યુવાનને કરણ પ્રેમજી મહિડા અને બે અજાણ્યા શખ્સે ઝઘડો કરી છરીના ઘા ઝીંકી દેતા લોહીલુહાણ હાલતમાં સારવાર માટે હોસ્પિટલ ખસેડાયો છે. ઇજાગ્રસ્ત યુવાનની ફરિયાદ મુજબ, તેના મિત્ર પ્રકાશ પંચાલના લગ્ન હોય તે નાનામવા રોડ, આંબેડકરનગર સાર્વજનિક પ્લોટમાં હાજર હતો. આ સમયે કેટલાક લોકો કેટરર્સ વાળા સાથે ઝઘડો કરતા હોય પોતે વચ્ચે પડતા કરણે પોતાને ખુરશીથી તેમજ ઢીકા પાટુનો માર માર્યા બાદ છરીના બે ઘા ઝીંકી દીધા હતા. તાલુકા પોલીસે ગુનો નોંધી તપાસ હાથ ધરી છે.
‘ભાઇ-બહેનના ઝઘડામાં કેમ રસ લો છો’ કહી પરિણીતાને પતિએ ઢોરમાર માર્યો
જ્યારે બીજા બનાવમાં નવા થોરાળા મેઇન રોડ પરના ભંગારના વાડા પાસે બેસવાની ના પાડી કુબલિયાપરાના વિકી વિજય નાથા અને વિજય નાથાએ આ જ વિસ્તારમાં રહેતા કમલેશ ઉર્ફે કમો દીપકભાઇ સોલંકીને ગાળો ભાંડી છરીથી હુમલો કરી ઇજા પહોંચાડી છે. પોલીસે બનાવની તપાસ હાથ ધરી છે.જ્યારે ત્રીજા બનાવમાં સદર બજારમાં રહેતી આશિયાના યુનુસભાઇ જુણાચ નામની પરિણીતાને પાડોશમાં રહેતા નઇમ ઉર્ફે ભયલુ મહેમૂદ જુણાચ, તેની બહેન હીના, સના અને હમીદાએ પોતાને તેમજ પતિને ધોકાથી માર માર્યાની ફરિયાદ નોંધાવી છે. આરોપી ભાઇ-બહેનો ઘર પાસે ઝઘડતા હોય અને પોતે પતિ સાથે ઘર પાસે બેઠા હતા.આ સમયે તમે અમારા ભાઇ-બહેનના ઝઘડામાં કેમ રસ લો છો તેમ કહી માર માર્યાનું ફરિયાદમાં જણાવ્યું છે. આ બનાવ અંગે પ્રદ્યુમ્નનગર પોલીસે ગુનો નોંધી તપાસ હાથ ધરી છે. છાશવારે બનતા મારામારીના બનાવો ડામવા પોલીસ લાલઆંખ કરે તે જરૂરી બન્યું છે.
દારૂના નશામાં નાનાભાઈએ મોટાભાઈને છરી મારી
રાજકોટ શહેરના ભગવતીપરામાં ઝમઝમ બેકરીથી આગળ રામપીર મંદિર પાસે રહેતાં અકરમ ઈશમાઇલભાઈ સરવદી (ઉ.વ.28) ગતરોજ દારૂના નશામાં હતો ત્યારે પોતાના ઘરે પરિવાર સાથે માથાકૂટ કરતો હોય જેને તેના મોટાભાઈ અઝાઝે સમજાવાનો પ્રયત્ન કરતાં હતાં ત્યારે તેમના હાથમાં રહેલ છરીનો ઘા હાથમાં લાગી જતાં ઇજાગ્રસ્ત થયો હતો. જેમને ઇજાગ્રસ્ત હાલતમાં સારવારમાં સિવિલ હોસ્પિટલમાં ખસેડવામાં આવ્યો હતો.બનાવ અંગે સિવિલ ચોકીના સ્ટાફે બી. ડિવિઝન પોલીસને જાણ કરતાં સ્ટાફ દોડી આવ્યો હતો અને જરૂરી કરીવાહી કરી હતી.
લિફ્ટના દરવાજામાં યુવકનું માથું ફસાયું, લોકોએ સત્વરે દરવાજો ખોલ્યો
ટંકારના લક્ષ્મીનારાયણ સોસાયટીમાં રહેતાં સતિષભાઈ ચતુરભાઈ રાઠોડ (ઉ.વ.21) આજે વહેલી સવારે રાજકોટના જ્યૂબેલી ચોકી પાસે પરા બઝારમાં આવેલ સંતકૃપા હોઝયરીના શો રૂમમાં ખરીદી માટે ગયેલ હતો. ત્યારે શો રૂમના બીજા માળે જવા માટે લિફ્ટમાં જતાં હતાં ત્યારે લિફ્ટના દરવાજો બંધ થતો હતો ત્યારે પોતાનું માથું બહાર કાઢતા બે દરવાજા વચ્ચે ફસાઈ ગયું હતું. ત્યારે શો રૂમનો સ્ટાફ દોડી આવ્યો હતો અને તાત્કાલિક યુવકનું માથું લિફ્ટમાંથી બહાર કાઢી સારવારમાં સિવિલ હોસ્પિટલમાં ખસેડવામાં આવ્યો હતો. બનાવ અંગે સિવિલ ચોકીના સ્ટાફે એ.ડિવિઝન પોલીસને જાણ કરી હતી.
દારૂના ગુનામાં ફરાર આરોપી ઝડપાયો
દારૂના ગુનામાં લાંબા સમયથી ફરાર જાવીદ ઉર્ફે જાવલાને એલસીબીની ટીમે ભગવતીપરામાંથી ઝડપી પાડી કાર્યવાહી કરી હતી. પ્રાપ્ત વિગત મુજબ રાજકોટ એલસીબી ઝોન 1ના પીએસઆઇ બી.વી.બોરીસાગર ટીમ સાથે પેટ્રોલીંગમાં હતાં ત્યારે મળેલ ચોક્કસ બાતમીના આધારે બી ડિવિઝન પોલીસ મથકના દારૂના ગુનામાં ફરાર જાવીદ ઉર્ફે જાવલો હનીફ સોઢા (ઉ.વ.27) ને ઝડપી પાડી કાયદેસરની કાર્યવાહી કરી હતી. ઉલ્લેખનીય છે કે, પકડાયેલ આરોપી અગાઉ મર્ડર અને મારામારીના ગુનામાં પણ પોલીસ ચોપડે ચડી ચુક્યો હોવાનું પોલીસ તપાસમાં સામે આવ્યું છે.
