અમદાવાદઃ ગુજરાતમાં છેલ્લા કેટલાક દિવસથી કડકડતી ઠંડી પડી રહી છે. ઠંડીના કારણે સ્કૂલના સમયમાં ફેરફાર કરવાની વાલીઓ માંગ કરી રહ્યા છે ત્યારે અમદાવાદ જિલ્લા શિક્ષણાધિકારીની કચેરીએ પરિપત્ર જાહેર કરી શાળાઓને સમયમાં ફેરફાર કરવાની છૂટ આપવામાં આવી હતી. ઠંડીના કારણે અમદાવાદની શાળાઓના સમયમાં ફેરફાર કરવાની છૂટ અપાઇ હતી.
અમદાવાદ શહેરની 500 શાળામાં પાંચ લાખથી વધુ વિદ્યાર્થીઓ અભ્યાસ કરે છે. મોટી ભાગની શાળાનો સમય સવારના સાત વાગ્યાનો છે. પરંતુ વહેલી સવારે 9થી 10 ડિગ્રી તાપમાનમાં વિદ્યાર્થી સ્કૂલે જઈ રહ્યાં છે. આ મામલે જિલ્લા શિક્ષણાધિકારીને આચાર્ય સંઘે રજૂઆત કરી હતી. તો કૉંગ્રેસે શિક્ષણ મંત્રીને રજૂઆત કરી કે, શાળાનો સમય એક કલાક મોડો કરવામાં આવે.
