Somy Ali Shocking Revelation: સલમાન ખાનની એક્સ ગર્લફ્રેન્ડ સોમી અલીએ તેના પર ઘણા ગંભીર આરોપ લગાવ્યા છે. સોમી અલીએ સોશિયલ મીડિયા પર ઘણી પોસ્ટ શેર કરી છે. જમાં તેણે કહ્યું છે કે સલમાન ખાને તેને શારીરિક અને માનસિક રીતે ટોર્ચર કરી છે. સોમીએ કહ્યું કે તે સલમાન ખાનના કારણે ઘણા વર્ષોથી ટ્રોમામાં હતી. સોમી અલીએ સલમાન ખાન પર આવો આરોપ લગાવીને સનસનાટી મચાવી દીધી છે. આવી સ્થિતિમાં ઘણા એવા લોકો છે જેમણે તેને ટ્રોલ કરવાનું શરૂ કરી દીધું છે. લોકો માને છે કે જો આ બધું તેની સાથે થયું છે તો તેણે આ વિશે પહેલા કેમ વાત ન કરી. તો બીજી તરફ કેટલાક લોકો સોમીના આ આરોપોને પબ્લિસિટી સ્ટંટ પણ ગણાવી રહ્યા છે.
સોમી અલીએ આપવીતી કહી
સોમી અલીએ હાલમાં જ તેના ઈન્સ્ટાગ્રામ પર એક વીડિયો શેર કર્યો છે. જેમાં તેણે પોતાના પર થઈ રહેલા શોષણ વિશે વાત કરી છે. આ સાથે તેણે તે લોકોને પણ જવાબ આપ્યો છે. જેઓ તેને માત્ર પોતાનો પબ્લિસિટી સ્ટંટ કહી રહ્યા છે. અભિનેત્રીએ આ વીડિયોમાં ખુલાસો કર્યો હતો કે 9 વર્ષની ઉંમરે તેને જાતીય શોષણનો સામનો કરવો પડ્યો હતો. આટલું જ નહીં જ્યારે તે 14 વર્ષની હતી ત્યારે હાઈસ્કૂલના છોકરાઓએ તેના પર બળાત્કાર ગુજાર્યો હતો. સોમી આ વીડિયોમાં કહે છે કે તેણે 3 વર્ષ પહેલા પહેલીવાર જાતીય શોષણ વિશે વાત કરી હતી. જ્યારે એક પત્રકારે તેની સાથે દુર્વ્યવહાર કર્યો હતો. આ પછી પાકિસ્તાનમાં એક રસોઈયાએ તેનું શોષણ કર્યું. એટલું જ નહીં એક ચોકીદારે સોમી અલીનું પણ શોષણ કર્યું. અભિનેત્રીના જણાવ્યા મુજબ જ્યારે તેણે વર્ષો પહેલા આ વિશે વાત કરી હતી ત્યારે તે તેનાથી કોઈ પ્રસિદ્ધિ મેળવવા માંગતી ન હતી.
‘સલમાન ખાન માફી માગે’
સલમાન ખાન વિશે વાત કરતાં સોમી અલી કહે છે કે એવું જરૂરી નથી કે જે દરેક સાથે સારું હોય તે તમારા માટે પણ સારું હોય. સોમીએ આ વીડિયોમાં કહ્યું છે કે સલમાન ખાને તેનું મૌખિક, જાતીય અને શારીરિક શોષણ થયું છે અને તે ઈચ્છે છે કે અભિનેતા આ માટે તેની માફી માંગે. સાથે જ સોમી અલીએ કહ્યું કે તેણે સલમાન ખાન સાથે વિતાવેલા 8 વર્ષ તેના જીવનના સૌથી ખરાબ વર્ષ હતા.