મોરબી17 મિનિટ પહેલા
- કૉપી લિંક
હળવદ તાલુકાના ચાડધ્રા ગામમાં આવેલા બ્રાહ્મણી નદીના પટમાં મોટાપાયે ખનીજ ચોરીની ફરિયાદને પગલે સ્ટેટ મોનીટરીંગ સેલની ટીમે સ્થાનિક પોલીસ અને ખનીજ વિભાગની ટીમને ઊંઘતી રાખી રેડ કરી હતી. જે સૌથી મોટી રેડમાં 12 હિટાચી, 13 ડમ્પર, 2 ટ્રક, ટ્રેક્ટર તેમજ 33 મોબાઈલ ફોન અને 7 બાઈક સાથે 30 ઇસમોને દબોચી લીધા છે. તો અન્ય 20 આરોપીઓના નામ ખુલતા તપાસના ચક્રો ગતિમાન કરવામાં આવ્યા છે. જોકે હાલ તો સ્ટેટ મોનીટરીંગ સેલની આટલી મોટી કાર્યવાહીથી રેતી માફિયાઓમાં સન્નાટો વ્યાપી ગયો છે.
સ્ટેટ મોનીટરીંગ સેલની ટીમના ડીવાયએસપી કે.ટી. કામરીયાના માર્ગદર્શન હેઠળ પીએસઆઈ સી.એન. પરમારની ટીમે હળવદ તાલુકાના ચાડધ્રા ગામે રેડ કરી હતી. જેમાં મોટા પાયે થતી ખનીજચોરીનો પર્દાફાશ કરવામાં આવ્યો હતો. જેમાં શનિવારે રાત્રે રેડ કરી જે રવિવારે એટલે કે આજે સાંજ સુધી સમગ્ર કામગીરી ચાલી હતી. મોટા પાયે ખનીજ ચોરી ઝડપી લેવામાં આવી હતી. જેમાં સ્થળ પરથી સ્ટેટ મોનીટરીંગ સેલની ટીમે 12 હિટાચી મશીન કિંમત રૂ. 48 લાખ, રેતી 82,130 ટન કિંમત રૂ. 2,79,24,200, ડમ્પર 13 કિંમત રૂ. 3.90 કરોડ, ટ્રક 2 કિંમત રૂ. 5 લાખ, લોડર 1 કિંમત રૂ. 3 લાખ, ટ્રેક્ટર-ટ્રોલી કિંમત રૂ. 3 લાખ, 33 મોબાઈલ ફોન કિંમત રૂ. 1,51,500, બાઈક 7 કિંમત રૂ. 2.10 લાખ મળીને કુલ રૂ. 12,63,85,700ની કિંમતનો તમામ મુદ્દામાલ જપ્ત કરવામાં આવ્યો હતો.
તેમજ આરોપી જીતેન્દ્રસિંહ હિંમતસિંહ પરમાર અને અન્ય 29 મળીને કુલ 30 આરોપીઓને ડીટેઈન કરી પોલીસ મથકમાં સોંપવામાં આવ્યા છે. જ્યાં હળવદ પોલીસે આરોપીઓ વિરુદ્ધ કાયદેસર કાર્યવાહી હાથ ધરી છે. તે ઉપરાંત આરોપીઓના નામો ખુલ્યા છે. જેમાં હળવદના રહેવાસી સુનીલ, જેઠા વણઝારા, જગો ઉર્ફે ઠુંઠો ભરવાડ, મયુરનગરમાં રહેતો સંદીપ ડાંગર, મોરબી રહેતો ઉદય આહીર, મયુરનગર રહેતો લાલો આહીર ઉર્ફે બીકે કરશન, મોરબીના અણીયારી રહેતો પરેશ પટેલ, હળવદના મિયાણીનો રહેવાસી અક્ષર ચતુરના નામો ખુલ્યા છે. આ સમગ્ર બાબતે પોલીસે વધુ તપાસ હાથ ધરી છે.
