છોટા ઉદેપુરએક કલાક પહેલા
- કૉપી લિંક
છોટા ઉદેપુર જિલ્લાના કવાંટ પોલીસને મોટી સફળતા મળી છે અને પ્રોહીબીશનના 17 ગુનામાં ફરાર અને રૂ. 10 હજારના ઈનામી આરોપીને ઝડપીને જેલના સળિયા પાછળ ધકેલી દીધો છે.
છોટા ઉદેપુર આદિવાસી બાહુલ્ય જિલ્લો છે અને સરહદી વિસ્તાર હોવાથી સામાજીક રીતે મધ્ય પ્રદેશ સાથે વ્યવહારો પણ ચાલુ છે. જેને લઇને કેટલાક ગુનાહિત તત્વો આનો લાભ લઈ રહ્યા છે અને ગુના આચરીને મધ્ય પ્રદેશ ભાગી જાય છે. આવો જ એક નામચીન અને સતત કવાંટ પોલીસના નાકમાં દમ કરી પ્રોહીબીશનના 17 જેટલા ગુના જેમાં કવાંટ પોલીસ મથકના 15 અને નસવાડી પોલીસ મથકના 2 ગુનામાં નાસતા ફરતા અને સરકાર દ્વારા રૂ. 10 હજારનું ઇનામ જાહેર કર્યું છે. તેવા આરોપી દલસિંગ ભૈડીયા (રાઠવા)ને ઝડપી પાડ્યો છે.
દલસિંગ ભૈડીયા (રાઠવા) કવાંટના નસવાડી ચોકડી પાસે ઊભો હોવાની બાતમી કવાંટ પોલીસને મળતાં કવાંટ પોલીસે તાત્કાલિક ત્યા પહોંચી જઈને આરોપીને ઝડપી પાડ્યો હતો. દલસિંગ ભૈડીયા (રાઠવા) એ મધ્ય પ્રદેશમાંથી ગુજરાતમાં દારૂ પહોંચાડવામાં સક્રિય ભૂમિકા ભજવી છે અને તેની સામે વર્ષ 2017થી અત્યાર સુધીમાં 17 જેટલા ગુના નોંધાયેલા છે અને ગુજરાત સરકારના નિયમ મુજબ એલ.સી.બી. છોટા ઉદેપુર દ્વારા 15/12/2022થી આરોપી ઉપર રૂ. 10,000નું ઇનામ પણ જાહેર કરવામાં આવ્યું હતું. કવાંટ પોલીસે આટલા મોટા આરોપીને ઝડપીને ખૂબ મોટી સફળતા મેળવી છે.