ભાવનગર43 મિનિટ પહેલા
- કૉપી લિંક
ભાવનગરમાં ભાજપ કાર્યકર્તાઓએ બંધ પડેલા હૃદયને આપાતકાલીન પ્રાથમિક ઉપચાર માટે તાલીમ મેળવી છે. ભાવનગર ખાતે સી.પી.આર તાલીમ અભિયાનમાં જિલ્લા અને શહેર ભાજપ સાથે મેડિકલ કોલેજનું સંકલન રહ્યું હતું.
પ્રાથમિક ઉપચાર માટે તાલીમ અભિયાનનો લાભ લીધો
પ્રદેશ ભાજપ દ્વારા સામાજિક પ્રવૃત્તિના ભાગ રૂપે ભાવનગર જિલ્લા ભાજપ અધ્યક્ષ રાઘવજી મકવાણા તથા શહેર ભાજપ અધ્યક્ષ અભયસિંહ ચૌહાણની ઉપસ્થિતિમાં મેયર કીર્તિબાળા દાણીધારિયા, ધારાસભ્યો સેજલબેન પંડ્યા તથા ગૌતમભાઈ ચૌહાણ અને જિલ્લા પંચાયત પ્રમુખ ભરતસિંહ ગોહિલ, ધીરુભાઈ ધામેલિયા, શિશિર ત્રિવેદી વગેરેની વિશેષ ઉપસ્થિતિમાં ભાવનગર મેડિકલ કોલેજ ખાતે બંધ પડેલા હૃદયના આપાતકાલીન પ્રાથમિક ઉપચાર માટે તાલીમ અભિયાનનો લાભ લીધો હતો.
રાજ્યવ્યાપી તાલીમનો પ્રારંભ અમદાવાદમાં થયો
શ્રી તખ્તસિંહજી હોસ્પિટલમાં નર્સિંગ કોલેજ સંકુલમાં ભાવનગર મેડિકલ કોલેજના વિભાગીય વડા લોપાબેન ત્રિવેદીના માર્ગદર્શન સાથે સાથી તબીબોએ પ્રાયોગિક રીતે સી.પી.આર. તાલીમ આપવામાં આવી હતી, રાજ્યવ્યાપી આ તાલીમ પ્રારંભમાં અમદાવાદ ખાતે મુખ્યમંત્રી ભૂપેન્દ્ર પટેલ અને સુરત ખાતે પ્રદેશ ભાજપ અધ્યક્ષ સી.આર. પાટીલ જોડાયા હતા.
108ના કર્મચારીઓનું સન્માન કરાયું
ઉલ્લેખનીય છે કે, સમગ્ર રાજ્યમાં 38 જેટલી તબીબી વિદ્યાલય સંસ્થાઓમાં 1200 જેટલા તબીબ નિષ્ણાતો દ્વારા આ તાલીમ માર્ગદર્શન અપાયેલ છે. આ કાર્યક્રમમાં ભાવનગર ખાતે 108 તાત્કાલિક સેવામાં વિશિષ્ટ કામગીરી કરનાર કર્મચારીઓનું સન્માન અભિવાદન કરવામાં આવ્યું હતું.ભાવનગર જિલ્લામાં આ તાલીમના સંયોજક ભરતભાઈ મેરના જણાવ્યા અનુસાર આ તાલીમમાં ભાવનગર શહેર તથા જિલ્લાના વિસ્તારવાર કાર્યકર્તાઓની ટુકડીએ નિષ્ણાત તબીબો દ્વારા પ્રત્યક્ષ નિદર્શન સાથે આ તાલીમ મેળવી છે.
ભાજપ મેડિકલ સેલ સાથે કાર્યકર્તાઓએ જહેમત ઉઠાવી
વ્યક્તિના આકસ્મિક રીતે બંધ પડેલા હ્રદયમાં કૃત્રિમ શ્વાસોચ્છવાસ માટે પ્રાથમિક સેવા થઈ શકે તથા જીવ બચાવી શકાય તે માટે ગુજરાત પ્રદેશ ભાજપના રાજ્ય વ્યાપી સ્વાસ્થ્ય સ્વયંસેવક અભિયાનના ભાગ રૂપે ભાવનગર ખાતે આ તાલીમ યોજાયાનું ભાજપ પ્રચાર સંયોજક કિશોર ભટ્ટ તથા સહસંયોજક મૂકેશ પંડિતે જણાવ્યું છે. જેમાં ભાજપ મેડિકલ સેલ સાથે કાર્યકર્તાઓએ ભારે જહેમત ઉઠાવી છે.
