રાજકોટએક કલાક પહેલા
- કૉપી લિંક
આરોપી કૌશિક વજુભાઈ દવે
રાજકોટમાં મોબાઈલ તેમજ છાનેખૂણે બેસીને ટેલિફોન પર સટ્ટો લેતાં બુકીઓ તેમજ તેની પાસે જુગાર ખેલતાં પંટરો ઉપર પોલીસની ખાસ વૉચ હોવાથી આઈપીએલ શરૂ થતાં જ એક પંટરને જાહેરમાં જુગાર રમતાં પકડી પાડ્યો છે. ક્રાઈમ બ્રાન્ચને ટીમે યાજ્ઞિક રોડ ઉપરથી એક મજૂરને મોબાઈલમાં જુગાર રમવા માટેનું આઈડી મેળવી તેના ઉપર સટ્ટો રમતા પકડી લઈને બે નામચીન બુકીના નામ ખોલ્યા છે.
ન્યુઝીલેન્ડ-શ્રીલંકાની મેચ પર સટ્ટો રમતો હતો
ક્રાઈમ બ્રાન્ચની ટીમે ગઈકાલે યાજ્ઞિક રોડ પર ઓપ્શન શો-રૂમ પાસેથી મોબાઈલમાં શંકાસ્પદ રીતે હલચલ કરી રહેલા કૌશિક વજુભાઈ દવેની અટકાયત કરી તેના ફોનની તલાશી લેતાં તેમાંથી બેટબોલ 999 ડોટ.કોમ નામનું આઈડી મળી આવ્યું હતું. આ આઈડી ઉપર કૌશિક ન્યુઝીલેન્ડ-શ્રીલંકા વચ્ચે રમાતી વન-ડે મેચ ઉપર સટ્ટો રમી રહ્યો હતો. આ ઉપરાંત તેણે એ જ આઈડીમાં કસીનો, તીનપત્તી વગેરે ગેમ ઉપર પણ ઓનલાઈન જુગાર રમ્યો હોવાનું ધ્યાન પર આવતાં કૌશિકની ધરપકડ કરવામાં આવી હતી.
ધરપકડ કરવા ચક્રો ગતિમાન કર્યા
કૌશિકની પૂછપરછ કરવામાં આવતાં તેણે જણાવ્યું હતું કે તેણે જુગાર રમવા માટેનું આ આઈડી નામચીન બુકી હર્ષદ ચંદારાણા તેમજ દીપુ વાંકાનેર પાસેથી લીધું હોવાની કબૂલાત આપતાં પોલીસે આ બન્ને બુકીઓ સામે ગુનો નોંધી તેમની શોધખોળ હાથ ધરી છે. પકડાયેલો કૌશિક પોતે મજૂરીકામ કરી પોતાનું ગુજરાન ચલાવતો હોવાનું જણાવ્યું છે. તે ઘણા સમયથી હર્ષદ સહિતના બુકીઓ પાસેથી આઈડી મેળવીને જુગાર રમતો હોવાની કબૂલાત આપતાં પોલીસે બન્ને બુકીઓની ધરપકડ કરવા ચક્રો ગતિમાન કર્યા છે.
ઉધાર-ઉછીના કરીને કરતો હતો
સટ્ટો રમતા પકડાયેલો કૌશિક વજુભાઈ દવેએ એવી કબૂલાત આપી હતી કે તે ઘણા સમયથી આ પ્રકારે જુગાર રમી રહ્યો છે. જ્યારે જ્યારે તે આઈડી પર જુગાર રમતી વખતે હારી જાય એટલે હારેલી રકમનું ચૂકવણું તે કોઈને કોઈ પાસેથી ઉધાર-ઉછીના કરીને કરતો હતો. અત્યાર સુધી તેણે આ રીતે જ પોતાનું ગાડું ગબડાવ્યે રાખ્યું હતું પરંતુ સટ્ટો રમવાની પોતાની આદત છોડાવી શક્યો નહોતો. આ ઉપરાંત તે છૂટક મજૂરીકામ કરતો હોવાથી ત્યાંથી પણ જે આવક થતી તે બધી સટ્ટામાં લગાવી દેતો હતો.