ભરૂચ30 મિનિટ પહેલા
- કૉપી લિંક
ભરૂચના મક્તમપુર ખાતે માટલા અને નર્સરીના માલિક પર થયેલા ફાયરિંગ મામલે પોલીસ તપાસમાં ચોંકાવનારો ખુલાસો થયો છે. ભોગ બનનારના પુત્રએ જ પિતાને મારી નાખવા માટે સોપારી આપી હોવાનો ખુલાસો થયો છે. પોલીસે ભોગ બનનારના પુત્ર સહિત બિહારના ત્રણ શુટરનો ઝડપી પાડી ઘટનાનો ભેદ ઉકેલી નાખ્યો છે.
વેપારી પર 11 એપ્રિલે ફાયરિંગની ઘટના બની હતી
ભરૂચના મકતમપુર ખાતે ગત 11 એપ્રિલે શિવશંકર નર્સરી તથા માટલાનો વેપાર કરતા વેપારી ઉપર 4 રાઉન્ડ ફાયરિંગ થયું હતું. અજાણ્યા શાર્પ શૂટરોએ હથિયારો વડે અંધાધૂંધ ફાયરીંગ કરી નાશી જતા પુત્રએ જ બિહારમાં જમીનની 4 વર્ષ જૂની અદાવતમાં ફાયરિંગની શંકા ફરિયાદમાં સેવી હતી. સી ડીવીઝન પોલીસ સ્ટેશન ખાતે હત્યાની કોશિશ , ગુનાહિત કાવતરૂ તથા આર્મ્સ એકટની સંલગ્ન કલમો મુજબ ગુનો રજીસ્ટર કરવામાં આવ્યો હતો. ફાયરિંગ અને હત્યાના પ્રયાસના ગંભીર ગુનામાં LCB પી.આઈ. ઉત્સવ બારોટ અને સી ડિવિઝન PI એચ.બી. ગોહિલ તેઓની ટીમ સાથે તપાસમાં લાગી ગયા હતા.
ત્રણેય આરોપીઓને બિહારથી ઝડપી પાડવામાં આવ્યા
અલગ અલગ ટીમો બનાવી રૂટ ઉપરના CCTV ફુટેજ , ટેકનીકલ સર્વેલન્સ અને હ્યુમન ઇન્ટેલીજન્સથી આરોપીઓનું પગેરૂ શોધી વર્ક આઉટ હાથ ધરાયુ હતું. હત્યાને અંજામ આપવા આરોપીઓ બિહારથી આવ્યા હોવાની કડી મળી હતી. શંકાસ્પદ આરોપીઓ બિહારના શિવહર શહેરમાં છે જે મુજબની હકિકત આધારે ઉપરી અધિકારીની સુચના અને મંજુરી આધારે PSI પી.એમ.વાળા, વી.પી.મલ્હોત્રા ટીમો સાથે રવાના થયા હતા. ગુન્હાને અંજામ આપનાર શાર્પ શુટર ત્રણેય આરોપીઓને ઝડપી પાડવામાં આવ્યા હતા.
શુટરની પૂછપરછમાં સનસનીખેજ હકીકત બહાર આવી
ગુન્હા બાબતે પુછપરછ કરતા આરોપીઓએ સનસનીખેજ કેફીયત આપેલ કે, ભોગ બનનાર માટલાના વેપારીનો પુત્ર લલન શાહ મિત્ર હોય તેને જણાવેલ કે પોતાના પિતા સાથે બે ત્રણ મહીનાથી તકરાર ચાલે છે . જેથી ત્રણેયને પિતાનું કાસળ કાઢવા ભરૂચ બોલાવતા તેઓ ત્રણેય ટ્રેન મારફતે ભરૂચ આવેલા. પિતાની હત્યાની સોપારી આપનાર પુત્ર લલન શાહે હોટલ ક્લાસિક ખાતે રોકાણની વ્યવસ્થા કરી હતી. શાર્પ શુટરો પકડાયા બાદ ફરિયાદ આપનાર પુત્ર લલન શાહ ઉપર પ્રબળ શંકા ઉપજેલ અને તેને ઝડપી પાડી ઊંડાણપુર્વકની પુછપરછ હાથ ધરતા ફરિયાદી લલન શાહે ગુન્હાની કબુલાત કરી હતી. પોતાના પિતા સાથે નાણાંકીય લેવડ – દેવડ બાબતે તકરાર ચાલતી હતી.
પિતાની સારવાર માટે ખર્ચેલા રૂપિયા પિતા ન આપતા હોય પુત્રએ…
વર્ષ 2019 માં વતન બિહારમાં પિતા રામ ઈશ્વર શાહ પર હુમલા બાદ લલને લાખો રૂપિયા વ્યાજે લઈ પિતાની સારવાર કરાવી હતી. સારવારના દેવાના રૂપિયા અને માટલા તેમજ નર્સરીના વેપારના નાણાં પિતા આપતા ન હોય લલને પિતાની ગેમ બજાવી દેવા સમગ્ર પ્લાન ઘડી નાખ્યો હતો.
પુત્ર સહિત ચાર આરોપીને ભરૂચ પોલીસ ઝડપી પાડ્યા
રવિવારે જિલ્લા પોલીસ વડા ડો. લીના પાટીલે પત્રકાર પરિષદ યોજી હતી. આ ફાયરિંગ અને હત્યાના પ્રયાસમાં નન્દકિશોર ઉર્ફે રાકેશ ટુનટુન શાહ, હરિઓમ કુમાર કમલકાન્તપ્રસાદ શાહ, રામાશંકર ઉર્ફે અભયકુમાર શ્રીગણેશ શાહ અને પિતાની જ સોપારી આપનાર પુત્ર લલનકુમાર રામઇશ્વર જંગબહાદુર શાહની ધરપકડ કરી છે. આરોપીઓ પાસેથી દેશી બનાવટનો તમંચો અને 4 મોબાઈલ મળી કુલ 20,500 નો મુદ્દામાલ કબ્જે કરાયો છે.