Punjab's Elvis Presley-Amar Singh shines | પંજાબના એલ્વિસ પ્રેસ્લી-અમર સિંહ ચમકીલા: લાઈવ શો પહેલા પત્ની અને 2 સાથીઓ સાથે તેમની હત્યા થઈ; મૃત્યુનું રહસ્ય 36 વર્ષથી વણઉકલ્યું રહ્યું છે

2 કલાક પેહલા

• કૉપી લિંક

‘અમર સિંહ ચમકીલા’ ફિલ્મ નેટફ્લિક્સ પર 12મી એપ્રિલે રિલીઝ થઈ છે. આ ફિલ્મ પંજાબના દલિત લોક ગાયક અમર સિંહ ચમકીલા પર બનાવવામાં આવી છે, જેને પંજાબના એલ્વિસ પ્રેસ્લી કહેવામાં આવે છે. લુધિયાણાના એક નાનકડા ગામ ધુબરીમાં જન્મેલા અમર ઈલેક્ટ્રીશિયન હતા, પરંતુ તેમની પાસે અનોખી પ્રતિભા હતી. તેઓ એક્સ્ટ્રા મેરિટલ અફેર્સ, પ્રેમ સંબંધો અને પતિ-પત્ની વચ્ચેના શારીરિક સંબંધો પર ગીતો રચતા હતા. પંજાબમાં લગ્નોમાં તેમના આ ગીતો પહેલી પસંદ હતા.

તેમની લોકપ્રિયતા એટલી બધી હતી કે તેમને દરરોજ કોઈને કોઈ લગ્નમાં ગાવા માટે બોલાવવામાં આવતા હતા. એવું પણ કહેવાય છે કે જો અમરસિંહ ચમકીલા વ્યસ્ત હોય અને ગાવાની ના પાડી દે તો લોકો લગ્ન પણ મુલતવી રાખતા હતા, પરંતુ તેમના ચાહકો કરતાં કરતાં તેમના દુશ્મનો વધી ગયા હતા. કેટલાક ચાહકો તેમનાં ગીતો પર નાચતા હતા, જ્યારે ઘણા હરિફ જૂથો તેમને ધમકી આપતા હતા કે- જો તે અશ્લીલ અને ડબલ મીનિંગ ગીતો ગાશે તો તેમને મારી નાખવામાં આવશે.

એક દિવસ એ ધમકી સાચી સાબિત થઈ. અમરસિંહ ચમકીલા એક લગ્નમાં ગાવા આવ્યા હતા, પરંતુ ત્યાં ગાતાં પહેલા જ તેમની ગોળી મારીને હત્યા કરવામાં આવી હતી. 8 માર્ચ, 1988ના રોજ તેમની હત્યાને 36 વર્ષ વીતી ગયા છે, પરંતુ તેમના હત્યારાઓ પકડાઈ શક્યા નથી. પંજાબી લોક ગાયકીનો સુવર્ણ યુગ તેમના મૃત્યુ સાથે સમાપ્ત થયો, પરંતુ તેમની લોકપ્રિયતામાં ક્યારેય ઘટાડો થયો નથી. આજે પણ પંજાબમાં તેમના ગીતો સાંભળવામાં આવે છે અને ગૂંજી ઊઠે છે.

આજે જાણો કોણ હતા લોક ગાયક અમરસિંહ ચમકીલા અને તેમની હત્યાની કહાની-

અમરસિંહ ચમકીલાનો જન્મ એક ગરીબ દલિત પરિવારમાં થયો હતો
અમર સિંહ ચમકીલાનો જન્મ 21 જુલાઈ, 1960ના રોજ લુધિયાણા નજીક સ્થિત ગામ દુગરીના એક દલિત પરિવારમાં થયો હતો. સાચું નામ ધનીરામ હતું. ગાયક બન્યા પછી તેનું નામ અમર સિંહ ચમકીલા પડ્યું. ગરીબ પરિવારમાં જન્મેલા અમર સિંહ ચમકીલાએ નાની ઉંમરમાં જ ભણવાનું છોડી દીધું અને કમાવા લાગ્યા.

અમરસિંહ ચમકીલાએ ઇલેક્ટ્રિશિયન બનવાનું સપનું જોયું
સામાન્ય રીતે દરેક યુવકનું સપનું હોય છે કે તે ડોક્ટર કે એન્જિનિયર બને, જો કે અમર સિંહ ચમકીલા નાની ઉંમરથી જ ઇલેક્ટ્રિશિયન બનવા માગતા હતા. તેમના આવડતથી તેમને કાપડની મિલમાં નોકરી મળી ગઈ. અહીં જ્યારે પણ તેમને કામમાંથી નવરાશ મળતી ત્યારે તેઓ ગીતો ગણગણતા હતા.

લગ્નમાં ગીત ગાતી વખતે લેવાયેલી અમર સિંહ ચમકીલાની તસવીર

પોતાની આસપાસ બનતી ઘટનાઓ જોઈને તે તેના પર ગાવાનું શરૂ કરી દેતા હતા. સમય વધવા સાથે અમરનો સંગીત પ્રત્યેનો રસ જાગવા લાગ્યો અને તેમણે ગાવાનું શરૂ કર્યું. ગામના લોકોની સાથે તે હાર્મોનિયમ અને ઢોલકી વગાડતા પણ શીખ્યા. ગામમાં જ્યારે પણ લગ્ન હોય ત્યારે તે અવારનવાર તેના મિત્રો સાથે ઢોલકી લઈને જતા.

પ્રથમ લગ્ન નાની ઉંમરે થયા, બે પુત્રીઓ મૃત્યુ પામી
અમર સિંહ ચમકીલાના લગ્ન ગામમાં રહેતી ગુરમેલ કૌર સાથે થયા હતા. બંનેને 4 બાળકો હતા, પરંતુ દુઃખની વાત એ છે કે તેમાંથી માત્ર તેમની 2 દીકરીઓ અમલદીપ અને કમલદીપ જ બચી શકી.

18 વર્ષની ઉંમરે ગાવાનો મોકો મળ્યો
તે સમયે લુધિયાણાના રહેવાસી સુરિન્દર શિંદાનું નામ પંજાબ મ્યુઝિક ઈન્ડસ્ટ્રીમાં ફેમસ હતું. એક દિવસ સુરિન્દર શિંદા અમર સિંહના ગામ પહોંચ્યા હતા. જ્યારે સુરિન્દર શિંદા ગામમાંથી બહાર જવા લાગ્યા, ત્યારે અમર સિંહ ચમકીલા પોતાની સાયકલ કાઢી અને પાછળ બેઠેલા પોતાના મિત્ર કુલદીપ પારસ સાથે તેમની પાછળ ગયા.

મીટિંગ દરમિયાન અમર સિંહ ચમકીલાએ તેમને કહ્યું કે, તે પણ તેમની જેમ ગાયક બનવા માગે છે. તેમણે સ્થળ પર જ પોતાની ગાયકીનો નમૂનો રજૂ કર્યો હતો. સુરિન્દર શિંદા તેમના અવાજથી એટલા પ્રભાવિત થયા કે તેમણે 18 વર્ષના અમર સિંહ ચમકીલાને નોકરીએ રાખ્યા. અમર સિંહે સુરિન્દરને પોતાના ગુરુ માનવા માંડ્યા અને તેમની સાથે સ્ટેજ શોમાં જવા લાગ્યા.

અમર સિંહ ચમકીલા ધૂન લખતા અને કંપોઝ કરતા હતા અને સુરિન્દર શિંદા સ્ટેજ પર એ જ ગીતો ગાતા હતા. કેટલાક પ્રસંગોએ સુરિન્દર શિંદાએ અમર સિંહ ચમકીલાને પણ સાથે ગાવાનો મોકો આપ્યો હતો. સ્ટેજ શો કરતી વખતે, તે પ્રખ્યાત પંજાબી લોક ગાયકો કે.દીપ, મોહમ્મદ સાદિક જેવા લોકો સાથે પણ પરફોર્મ કરવાનો મોકો મળ્યો.

માત્ર 100 રૂપિયાનો પગાર મળતો હતો
અમર સિંહ ચમકીલા દ્વારા લખાયેલા ગીતોથી સુરિન્દર શિંદાને ઘણી ઓળખ મળી હતી. જો કે, અમરસિંહ ચમકીલા માત્ર લેખક જ રહ્યા. બીજી તરફ, તેમનો પગાર મહિને માત્ર 100 રૂપિયા હતો, જ્યારે સુરિન્દર શિંદા તેમના ગીતો ગાઈને હજારો કમાતા હતા.

80ના દાયકાની શરૂઆતમાં, સુરિન્દર શિંદા અને તેમના જૂથની મહિલા મુખ્ય ગાયિકા સુરિન્દર સોનિયા વચ્ચે અણબનાવ થયો હતો. વાસ્તવમાં સુરિન્દર શિંદા કેનેડા પ્રવાસ પર સોનિયાના બદલે ગુલશન કોમલને પોતાની સાથે લઈ ગયા હતા. આનાથી સોનિયા એટલી નારાજ થઈ ગઈ કે તેણે અમર સિંહ ચમકીલાને પોતાની નવી ટીમ બનાવવા માટે કહ્યું. અમર સિંહ ચમકીલાએ સ્પષ્ટપણે તેમના માર્ગદર્શક સાથે દગો કરવાનો ઇનકાર કર્યો હતો, પરંતુ સમય જતાં તેઓ એક નવી ટીમ બનાવવા અને પોતાની રીતે પોતાની છાપ બનાવવા માટે સંમત થયા.

વર્ષ 1980માં અમર સિંહ ચમકીલા અને સોનિયાનું આલ્બમ ‘ટાકુ તે તકુઆ’ રિલીઝ થયું હતું, જેમાં બંનેએ 8 યુગલ ગીતો ગાયાં હતાં. આ આલ્બમ સમગ્ર પંજાબમાં ખૂબ જ સફળ રહ્યું હતું અને અમર સિંહ ચમકીલાને કાર્યક્રમો અને સ્ટેજ શો માટે ઘણી ઓફર મળવા લાગી હતી. બંનેની જોડી પંજાબમાં ઘણી હિટ રહી હતી.

અમર સિંહ ચમકીલા અને સોનિયાના આલ્બમની તસવીર

અમર સિંહ ચમકીલા ડબલ અર્થ, દારૂ અને ઘરેલુ હિંસા પર ગીતો લખતા હતા
​​​​​​​અમરસિંહ ચમકીલા પોતાના ગીતો લખતા હતા. તેમના ગીતોનો વિષય મોટે ભાગે એક્સ્ટ્રા મેરિટલ અફેર, દારૂ અને પંજાબમાં વધતા ડ્રગ્સના ઉપયોગ પર હતા. તે પોતાના ગીતો પણ જાતે જ રચતા હતા. તેમના ઘણા ગીતો સંબંધો પર પણ હતા, જેનો ડબલ અર્થ પણ થતો હતો. ઘણા લોકો કહેતા હતા કે અમર સિંહ અશ્લીલ ગીતો ગાતા હતા, પરંતુ આ ગીતો તેમની ઓળખ બની ગયા.

પ્રથમ ભાગીદારીમાં છેતરપિંડી થઈ, એકલે હાથે ઓળખ બનાવી
​​​​​​​અમરસિંહ ચમકીલા અને તેની ભાગીદાર સોનિયાના મેનેજર સોનિયાના પતિ હતા. તે બંનેના ગીતો ચોક્કસપણે હિટ થઈ રહ્યા હતા, પરંતુ તેમના મેનેજર સોનિયાને અમર સિંહ ચમકીલા કરતાં વધુ ફી ચૂકવતા હતા. તેમને દરેક કાર્યક્રમ માટે લગભગ 800 રૂપિયા મળતા હતા, જેમાંથી 600 રૂપિયા સોનિયાને અને માત્ર 200 રૂપિયા અમર સિંહ ચમકીલાને આપવામાં આવતા હતા. જ્યારે તેમણે આ છેતરપિંડી સામે અવાજ ઉઠાવ્યો, ત્યારે લડાઈ થઈ અને ટીમ તૂટી ગઈ.

અમર સિંહ ચમકીલા અને સોનિયાએ મળીને કુલ 99 ગીતો ગાયા છે

ગ્રૂપની સિંગર સાથે પ્રેમમાં પડ્યા, પછી તેના લગ્ન થતાં વિવાદ થયો.
જ્યારે ટીમ તૂટી ગઈ ત્યારે અમર સિંહ ચમકીલાએ હાર ન માની અને વિવિધ મહિલા ગાયકો સાથે પરફોર્મ કરવાનું શરૂ કર્યું.

અમરસિંહ ચમકીલા કાયમી સ્ત્રી ગાયિકાની શોધમાં હતા. દરમિયાન તેમની મુલાકાત અમરજોત સાથે થઈ. તેમને અમરજોતનો અવાજ ગમ્યો અને બંનેએ સાથે ગાવાનું શરૂ કર્યું. આ બંનેનું પહેલું આલ્બમ ‘ભુલ ગયી મેં ઘુંડ ખાડના’ ખૂબ જ સફળ રહ્યું હતું. કાર્યક્રમ દરમિયાન સાથે સમય વિતાવતા બંને એકબીજાને પસંદ કરવા લાગ્યા અને લગ્ન કરી લીધા.

પત્ની અમરજોત સાથે પ્રદર્શન કરતી વખતે અમર સિંહ ચમકીલા

અમર સિંહ ચમકીલા અને અમરજોતના લગ્ન ઘણા કારણોસર વિવાદોમાં રહ્યા હતા. પહેલો વિવાદ એ હતો કે અમરસિંહ ચમકીલા પહેલાથી જ પરિણીત હતા. બીજો સૌથી મોટો વિવાદ એ હતો કે અમરસિંહ ચમકીલા દલિત હતા અને અમરજોત ઉચ્ચ જાતિના જાટ હતા. ઘણી વખત જુદા જુદા જૂથોએ તેમને જાનથી મારી નાખવાની ધમકી આપી હતી. જો કે, આ ધમકીઓની તેમના સંબંધો પર કોઈ અસર થઈ નહોતી. લગ્નના એક વર્ષ પછી અમરજોતે પુત્ર જૈમન ચમકીલાને જન્મ આપ્યો.

અમરસિંહ ચમકીલા અને તેમની પત્ની અમરજોત પુત્ર જૈમન સાથે

તેમની વધતી જતી લોકપ્રિયતાને કારણે અમર સિંહ ચમકીલાને મોટા સ્ટુડિયોમાંથી ગાવાની ઓફર મળવા લાગી. તેમના ઘણા ગીતો​​​​​​ રેકોર્ડ પણ​​​​​​​ કરવામાં આવ્યા હતા, જેની કેસેટો બહાર પાડવામાં આવી હતી. તેમના દ્વારા ગાયેલા અને લખાયેલા ગીતો એટલા હિટ હતા કે તેનું બ્લેક માર્કેટિંગ કરવામાં આવ્યું હતું. અમર સિંહ ચમકીલા અને અમરજોતનું સૌથી હિટ ગીત ‘પહિલે લલકારે નાલ મેં ડર ગયી રહા.’

અમર સિંહ ચમકીલા અને અમરજોતની તસવીર આલ્બમ ગીતના કવર માટે ક્લિક કરવામાં આવી હતી

કેનેડા અને દુબઈમાં પણ અમરસિંહ ચમકીલાના કાર્યક્રમો યોજાયા હતા
પંજાબ અને દિલ્હી ઉપરાંત વિદેશોમાં પણ અમરસિંહ ચમકીલાના ગીતોની ચર્ચા થઈ હતી. તેમણે કેનેડામાં ઘણા સ્ટેજ શો પણ કર્યા. તેમને દુબઈથી ઘણી વખત ગાવા માટે પણ આમંત્રણ આપવામાં આવ્યું હતું. ઈન્ડિયન એક્સપ્રેસના અહેવાલ મુજબ, તે એક સ્ટેજ શો માટે 500 રૂપિયા અને લગ્નમાં ગાવા માટે 4,000 રૂપિયા લેતા હતા.

તારીખો ન મળે તો લોકો લગ્ન મુલતવી રાખતા હતા
અમર સિંહ ચમકીલા તે યુગના સૌથી પ્રખ્યાત પંજાબી ગાયક હતા. એવું કહેવાય છે કે જો તે વ્યસ્ત હોવાને કારણે લગ્નમાં ગાવાની ના પાડે તો લોકો અમર સિંહના શેડ્યૂલ પ્રમાણે લગ્નની તારીખો બદલી નાખતા હતા.

મારી નાખવાની ધમકીઓ દરરોજ મળતી હતી
જેમ જેમ અમરસિંહ ચમકીલાની લોકપ્રિયતા વધી રહી હતી તેમ તેમ તેમના દુશ્મનોની યાદી પણ વધી રહી હતી. તેમની સાથે કામ કરનારા ઘણા ગાયકો તેમની સફળતાની ઇર્ષ્યા કરી રહ્યા હતા અને તેમના ગીતો અને ગીતોની ટીકા કરતા હતા. તેમની ઇમેજ ખરાબ કરવા માટે ઘણી વખત ખોટી અફવાઓ ફેલાવવામાં આવી હતી. 80ના દાયકાના અંતમાં, તેમને રોજેરોજ જાનથી મારી નાખવાની ધમકીઓ મળવા લાગી.

અશ્લીલ ગીતો માટે શીખ આતંકવાદી જૂથ સામે માફી માગી હતી

જ્યારે ધમકીઓનું પ્રમાણ વધવા લાગ્યું, ત્યારે અમર સિંહ ચમકીલાએ શીખ આતંકવાદીઓના જૂથની માફી માગી હતી અને તેમણે અશ્લીલ ગીતો નહીં લખવાની ખાતરી પણ આપી હતી.

વિનંતી પર પ્રેક્ષકોને અશ્લીલ ગીતો વગાડવામાં આવે છે.

ધમકીઓના ડરથી અમરસિંહ ચમકીલાએ અશ્લીલ અને ડબલ મીનિંગ ગીતો ગાવાનું બંધ કરી દીધું અને ધાર્મિક ગીતો ગાવાનું શરૂ કર્યું. જ્યારે પણ તે લગ્નમાં ધાર્મિક ગીતો ગાતો ત્યારે લોકો તેની પાસેથી અશ્લીલ ગીતોની માંગણી કરતા હતા. શરૂઆતમાં તેણે અશ્લીલ ગીતો લખવાની સ્પષ્ટ ના પાડી દીધી, પરંતુ જ્યારે માંગ વધવા લાગી ત્યારે તેણે ફરીથી આવા જ ગીતો લખવાનું અને ગાવાનું શરૂ કર્યું.

અજાણ્યા હત્યારાઓએ ગોળી મારી પત્ની અમરજોતની પણ હત્યા કરી હતી
8 માર્ચ, 1988ના રોજ, અમર સિંહ ચમકીલા તેમની પત્ની અમરજોત અને 3 મિત્રો સાથે ફિલૌર નજીકના મહામગાંવમાં આયોજિત લગ્નમાં પરફોર્મ કરવા આવ્યા હતા. 27 વર્ષીય અમર સિંહ ચમકીલા તેમના સાથીઓ સાથે કારમાંથી નીચે ઉતર્યા કે તરત જ કેટલાક અજાણ્યા લોકોએ તેમના પર અંધાધૂંધ ગોળીબાર શરૂ કરી દીધો. આ હુમલામાં અમરસિંહ ચમકીલા, તેમની પત્ની અમરજોત, સાથી બળદેવ અને રણજીતનું મોત થયું હતું, જ્યારે એક સાથી ઘાયલ થયો હતો.

હત્યા બાદ લેવાયેલ અમરસિંહ ચમકીલા અને અમરજોતના મૃતદેહોના ફોટોગ્રાફ

મૃત્યુ પછી ઘણી થિયરીઓ સામે આવી, હત્યારા મળ્યા નહી
અમરસિંહ ચમકીલાના મૃત્યુ બાદ તેમના પરિવારે તેમના હત્યારાઓ સામે કોઈ ફરિયાદ નોંધાવી ન હતી. નવાઈની વાત તો એ છે કે આટલા મોટા અને પ્રખ્યાત કલાકાર હોવા છતાં પણ પોલીસે હત્યારાઓને શોધવા માટે કોઈ પ્રયાસ કર્યો ન હતો.

જો કે, સમયાંતરે તેમના મૃત્યુના વિવિધ સિદ્ધાંતો બહાર આવ્યા. અશ્લીલ ગીતોના કારણે ખાલિસ્તાનીઓએ તેની હત્યા કરી હોવાનું કહેવાય છે. જ્યારે કેટલાક માને છે કે દલિત હોવાને કારણે અને જાટ અમરજોત સાથે લગ્ન કરવાના કારણે ઘણા લોકો તેમનાથી નારાજ હતા. એક થિયરી એ પણ બહાર આવી હતી કે, તેમના સમયના ગાયકોએ અમર સિંહની સફળતાને કારણે તેમની હત્યા કરાવી હતી. જો કે, તેમના મૃત્યુના 39 વર્ષ પછી પણ સાચું કારણ શું હતું તે જાણી શકાયું નથી.

ઈમ્તિયાઝ અલીએ બનાવી છે આ ફિલ્મ
‘અમર સિંહ ચમકીલા’ ફિલ્મ નેટફ્લિક્સ પર 12 એપ્રિલે રિલીઝ થઈ છે. ફિલ્મમાં લોકપ્રિય ગાયક અને અભિનેતા દિલજીત દોસાંઝ અમર સિંહ ચમકીલાનું પાત્ર ભજવે છે, જ્યારે પરિણીતિ ચોપરા તેમની પત્ની અમરજોતની ભૂમિકામાં છે.