[og_img]
- બિશન સિંહ બેદી પત્ની અંજુ સાથે કરતારપુર સાહિબ ગયા હતા
- પાકિસ્તાનથી તેમના મિત્રો બેદીને મળવા કરતારપુર સાહિબ આવ્યા
- પાકિસ્તાનના પૂર્વ કેપ્ટન ઈન્તિખાબ આલમ બિશન સિંહ બેદીને મળ્યા
4 ઓક્ટોબરના રોજ એક સુંદર ભાવનાત્મક દ્રશ્ય સર્જાયું હતું, જ્યારે ભારત અને પાકિસ્તાનના બે ક્રિકેટ દિગ્ગજો એકબીજાને મળ્યા હતા. તે ભારતના મહાન સ્પિન બોલર બિશન સિંહ બેદી અને પાકિસ્તાનના દિગ્ગજ ઈન્તિખાબ આલમ હતા. બિશન સિંહ બેદી અને ઈન્તિખાબ આલમ કરતારપુર ગુરુદ્વારામાં મળ્યા હતા, જે પાકિસ્તાનમાં છે અને ભારતીયો માટે ખુલ્લું મુકાયું છે.
સરહદ પારની દોસ્તી
જ્યારે ભારતના મહાન સ્પિનર બિશન સિંહ બેદી કરતારપુર સાહિબમાં તેમના જૂના મિત્ર અને પાકિસ્તાન ક્રિકેટ ટીમના ભૂતપૂર્વ કેપ્ટન ઈન્તિખાબ આલમને મળ્યા ત્યારે તેઓ એટલા ભાવુક થઈ ગયા કે તેઓ ઉમળકાભેર મળ્યા, હસ્યા અને સાથે રડ્યા.
બિશન સિંહ બેદી કરતારપુર પહોંચ્યા
નવેમ્બર 2019માં કરતારપુર કોરિડોર ખોલ્યા બાદ બિશન સિંહ બેદી ત્યાં તેમનું દર્શન કરવા માટે સરહદ પાર જવા માંગતા હતા. ગુરુ નાનક દેવે તેમનો અંતિમ સમય કરતારપુરમાં વિતાવ્યો હતો. બિશન સિંહ બેદી કોરોના સંક્રમણ અને ખરાબ તબિયતના કારણે પહેલા ત્યાં જઈ શક્યા ન હતા. અંતે તેઓ મંગળવારે કરતારપુર ગયા હતા.
સરહદ પારના મિત્રો સાથે મુલાકાત
તેની પત્ની અંજુએ કહ્યું, “બિશનને હવે સારું છે પરંતુ 100% સ્વસ્થ નથી. તે નિયમિત મુસાફરી કરી શકતા નથી. અમારે અમારા પૌત્રના જન્મદિવસ માટે અમૃતસર આવવાનું હતું, તેથી અમે વિચાર્યું કે આપણે સાથે મળીને કરતારપુર સાહિબને પણ પ્રણામ કરીએ.” આવી સ્થિતિમાં જ્યારે બિશન સિંહ બેદી કરતારપુર પહોંચ્યા ત્યારે પાકિસ્તાનના પૂર્વ ક્રિકેટર ઈંતિખાબ આલમ અને શફકત રાણા સરહદ પાર તેમની રાહ જોઈ રહ્યા હતા.
ઇંતિખાબ આલમે ખુશી વ્યક્ત કરી
ઇંતિખાબ આલમે આ નાગે કહ્યું હતું કે , “મારી અને બિશનની મિત્રતા 50 વર્ષ જૂની છે. તેને મળીને ખૂબ જ સારું લાગ્યું, જોકે તેને વ્હીલચેરમાં જોવું સારું ન હતું, પરંતુ સદનસીબે તે ઝડપથી સ્વસ્થ થઈ રહ્યો છે. હું તેમને છેલ્લે 2013માં કોલકાતામાં મળ્યો હતો, પરંતુ અમે વોટ્સએપ અને ફોન પર સંપર્કમાં હતા. મેં વિચાર્યું પણ નહોતું કે અમે કરતારપુર સાહિબમાં મળીશું. અમારા બંને માટે તે ખૂબ જ ભાવનાત્મક ક્ષણ હતી. અમે જૂની યાદો તાજી કરી અને અમારી પાંપણ ભીની થઈ ગઈ, પણ પંજાબી હોવાને કારણે ફરી હસવા લાગ્યા.
બંને દિગ્ગજોના મિલનનો વીડિયો વાયરલ
એક પાકિસ્તાની પત્રકારે પોતાના ટ્વિટર હેન્ડલ પરથી બિશન સિંહ બેદી, ઈન્તિખાબ આલમ અને શફકત રાણાની આ મીટિંગનો વીડિયો શેર કર્યો છે.
પરિવારજનોએ સાથે મળી લંગરનો આનંદ લીધો
ઈન્તિખાબ આલમનો જન્મ પંજાબના હોશિયારપુરમાં થયો હતો અને 2000માં તે ભારતની પંજાબ ટીમના કોચ પણ રહી ચૂક્યા છે. ગુરુદ્વારામાં બે મહાન ક્રિકેટરો અને તેમના પરિવારજનોએ સાથે મળીને લંગરનો આનંદ લીધો, જે બાદ અંજુએ આલમને ગાવાની ખાસ વિનંતી કરી. ત્યારબાદ આલમે લુઈસ આર્મસ્ટ્રોંગની ‘વ્હેન ધ સેઈન્ટ્સ ગો માર્ચિંગ ઈન’ માંથી કેટલીક પંક્તિઓ ગાયી, જે 1971ના ઓસ્ટ્રેલિયાના પ્રવાસ પર બંને દિગ્ગજોને લઇ ગઈ.
મિત્રોને મળી ભાવુક થયા બિશન સિંહ બેદી
આલમે કહ્યું, “મેં આ ગીત બ્રાયન હાર્ડી નામના છોકરા પાસેથી સ્કોટલેન્ડમાં મારા રમતના દિવસો દરમિયાન લીધું હતું. અંજુ ભાભીએ મને ગાવાની વિનંતી કરી અને હું ના કહી શક્યો નહીં. હું તે સમયે બિશનને ભાવુક થતો જોઈ શકતો હતો.” બિશન સિંહ બેદી ગયા વર્ષે તેમની સર્જરી પછી ઘણા લોકોને ઓળખી શક્યા ન હતા, પરંતુ જ્યારે તેમણે પાકિસ્તાનથી આવેલા તેમના મિત્રોને જોયા ત્યારે તેમનો ચહેરો ચમકી ગયો.