વડોદરાએક કલાક પહેલા
- કૉપી લિંક
કલેક્ટરે ચૂંટણી વ્યવસ્થાપન અંગેની બારીકાઈથી સમીક્ષા કરી.
ગુજરાત વિધાનસભાની સામાન્ય ચૂંટણી બે તબક્કામાં યોજાનાર છે. વડોદરા શહેર જિલ્લાની 10 વિધાનસભા બેઠકોની સામાન્ય ચૂંટણી માટેનું મતદાન આગામી 5 ડિસેમ્બરના રોજ સવારે 8 કલાકથી સાંજના 5 કલાક સુધી યોજાનાર છે. જ્યારે મતગણતરી 8 ડિસેમ્બરના રોજ યોજાનાર છે. જિલ્લા ચૂંટણી અધિકારી અને કલેકટર અતુલ ગોરના માર્ગદર્શન હેઠળ શહેર જિલ્લાની દસ બેઠકો માટેની ચૂંટણી અંગે મતદાન માટેની તૈયારીઓને આખરી ઓપ આપવામાં આવી રહ્યો છે. શહેર જિલ્લામાં મુક્ત, ન્યાયી અને નિષ્પક્ષ ચૂંટણી માટે જિલ્લા ચૂંટણી તંત્ર સજ્જ હોવાનું તેમણે ઉમેર્યું હતું.
283 રુટ નિયત કરાયા
જિલ્લા ચૂંટણી અધિકારી અતુલ ગોરે જણાવ્યું કે આગામી 4 ડિસેમ્બરના રોજ શહેર જિલ્લાની વિધાનસભા મત વિભાગના નિયત 10 રવાનગી કેન્દ્રો ખાતેથી મતદાન સામગ્રી રવાના કરવામાં આવશે. જિલ્લામાં 2590 મતદાન મથકો ઊભા કરવામાં આવ્યા છે. મતદાન સામગ્રી મતદાન મથકો ખાતે પહોચાડવા માટે 283 રૂટ નિયત કરવામાં આવ્યા છે. ચૂંટણીમાં બેલેટ યુનિટ 3924, કંટ્રોલ યુનિટ 3924 અને 5367 વી.વી.પેટનો ઉપયોગ કરવામાં આવશે. ચૂંટણીમાં 13850 પુરુષ અને 7885 મહિલા સહિત કુલ 21,735 ચૂંટણી કર્મીઓ ફરજ બજાવશે.
1330 મતદાન મથકોની પ્રક્રિયાનું વેબ કાસ્ટીંગ
જેમાં 264 મોટી બસ, 100 મીની બસ, 258 જીપ સહિત 622 વાહનોનો ઉપયોગ કરવામાં આવનાર છે. તમામ રૂટ પર 283 ઝોનલ ઓફિસરની નિમણુક કરવામાં આવી છે. અતુલ ગોરે જણાવ્યું કે શહેર જિલ્લાના 1330 મતદાન મથકો ખાતે મતદાન પ્રક્રિયાનું લાઈવ વેબ કાસ્ટીંગ કરવામાં આવશે.
કામગીરીની સમીક્ષા કરાઇ
મતદાન દરમ્યાન શહેર જિલ્લામાં કાયદો અને વ્યવસ્થાની જાળવણી માટે ચુસ્ત પોલીસ બંદોબસ્ત ગોઠવવામાં આવશે. એટલુ જ નહિ મતદાન મથકોથી નિયત અંતર સુધી મતદારો અને ચૂંટણી કામે રોકાયેલા અધિકારી કર્મીઓ સિવાયના અનઅધિકૃત વ્યક્તિના પ્રવેશ પર પ્રતિબંધ ફરમાવવામાં આવ્યો છે. મતદાન પૂર્વે દસેય બેઠકના પ્રતિપ્રેષક અધિકારીઓ સાથે યોજાયેલી મહત્વપૂર્ણ બેઠકમાં કલેક્ટરે ચૂંટણી વ્યવસ્થાપન અંગેની બારીકાઈથી સમીક્ષા કરી હતી.
