અમદાવાદ5 મિનિટ પહેલા
કહેવાય છે કે કોઈને પણ સરળતાથી જે રૂપિયો આવે તે ખૂબ ગમતો હોય છે અને તેના માટે તે અવનવી સારી કે ખોટી તરકીબો જ મહત્વની હોય છે. આવું જ અમદાવાદના પૂર્વ વિસ્તારમાં બન્યું છે. જ્યાં એક ગેંગ પોતાના મોજ શોખ માટે શોર્ટકટથી રૂપિયા કમાવવા માંગતી હતી પણ એને કોઈ રસ્તો ન મળતા તેને દૂધના કેરેટ અને દૂધની થેલીઓ ચોરી કરવાનું શરૂ કર્યું હતું. જે અનેક દિવસ સુધી ચાલતું રહ્યું. પરંતુ આ સમગ્ર મામલે પોલીસની નજરે ચડતા પોલીસે આખી ગેંગને ઝડપી પાડી છે. આરોપીઓ 50 ટકા કિંમતે દૂધ દુકાનદારોને વેચી દેતા હતા.
દૂધની ચોરી કરતી ગેંગને ઝડપી પાડી
અમદાવાદના પૂર્વ વિસ્તારમાં પોલીસે એક એવા ચોરોની ધરપકડ કરી છે જે સોનું-ચાંદી કે કિંમતી વસ્તુ નહીં પણ દૂધની ચોરી કરતા હતા. પોલીસે અમદાવાદ શહેરના પૂર્વ વિસ્તારમાંથી નરોડા, નિકોલ, ઓઢવ એમ અલગ અલગ જગ્યાએ દૂધની ચોરી કરતી ગેંગને ઝડપી પાડી છે. આ ગેંગમાં સામેલ બે શખ્સો ઝડપાયા છે. જેમના નામ (1) દિપક લક્ષ્મણભાઈ સોમભાઈ ઠાકોર (ઉવ.૨૨)(રહે. ૩, ચામુંડાની ચાલી, મામા કલ્યાણ ચોક પાસે, નિકોલ રોડ) અને (2) દશરથ ઉર્ફે અમરત ઉર્ફે કાળીયો સબુરજી રત્નાજી ઠાકોર (ઉવ.૨૩) (રહે. લીંમડા ચોક, આનંદ સ્કુલની સામે, ભરવાડવાસની બાજુમાં, નરોડા) છે.
નાની-નાની દુકાનોમાં 50 ટકાની કિંમતે વેચતા
પકડાયેલા બંને શખ્સો જે પોલીસ સમક્ષ કબૂલાત કરી તે જાણીને પોલીસ પણ એક સમયે ચોંકી ઉઠી હતી. કારણ કે આ લોકો પોતાના મોજ શોખ માટે એવી વસ્તુને ચોરી કરતા હતા જેના પર કોઈને શંકા ન જાય. અને આરોપીઓ નરોડા નિકોલ ઓઢવ કૃષ્ણનગર જેવા વિસ્તારમાં દૂધના આખા કેરેટ ચોરી લેતા હતા અને અન્ય નાની-નાની દુકાનોમાં 50 ટકાની કિંમતે વેચતા હતા. છેલ્લા બે મહિનાથી ચાલતા આ દૂધ ચોરીના નેટવર્કને પોલીસને શોધી કાઢ્યું છે.
43 જગ્યાએ દૂધ અને દૂધના કેરેટની ચોરી કરી
પોલીસે આરોપીને પકડીને કઈ કઈ જગ્યાએ ચોરી કરતા જાણવા મળ્યું કે અત્યાર સુધી તેમણે 43 જગ્યાએ દૂધ અને દૂધના કેરેટની ચોરી કરી છે. આરોપીઓ સંખ્યાબંધ જગ્યાએ ચોરી કરીને જે રૂપિયા મળતા તેને મોજ શોખ પાછળ વાપરતા હતા. સમગ્ર જગ્યાએ કરેલી ચોરીના સીસીટીવી પણ પોલીસને હાથે લાગ્યા છે. હવે આરોપીઓ પાસે વધુ વિગતની તેમજ જે જે લોકોને દૂધ વેચ્યું હતું તેની પણ પૂછપરછ કરવા માટેના પ્રયાસો હાથ ધર્યા છે.