અમદાવાદ પરિણીતાએ પતિ અને સાસુ વિરુદ્ધ ફરિયાદ નોંધાવી

અમદાવાદ: શહેરમાં રહેતી એક યુવતીના થોડા વર્ષ પહેલા જ આણંદ ખાતે રહેતા એક યુવક સાથે લગ્ન થયા હતા. લગ્ન બાદ આ યુવતીએ પતિના ફોનમાં કોઇ છોકરીનો ફોન આવ્યો હોવાનું જાણતા તેણે તેના પતિને તે બાબતે પૂછ્યું હતું. જેથી પતિ આવેશમાં આવી ગયો હતો. જોકે યુવતીને જાણ થઇ કે, તેમના નિકાહ પહેલા જ પતિને તે છોકરી સાથે પ્રેમ સંબંધ હતો. આ ફરિયાદ યુવતીને તેની સાસુને કરતા તેની સાસુએ ઉડાઉ જવાબ આપીને મારો દીકરો દિવસમાં 10 છોકરીઓ સાથે સૂતો હોય પણ રાત્રે તો તારી પાસે આવે છે ને કહીને દીકરાનો પક્ષ લીધો હતો. બાદમાં પતિ ને નણંદ ભેગા મળી દહેજ માંગી યુવતીને માર મારી ત્રાસ આપતા અને પતિએ પણ ત્રણ વાર તલાક કહી દેતા આખરે મામલો પોલીસ મથકે પહોંચતા પોલીસે તપાસ શરૂ કરી છે.

હાલ, અમદાવાદના જમાલપુર વિસ્તારમાં રહેતી 26 વર્ષીય યુવતીના લગ્ન આણંદ ખાતે રહેતા એક યુવક સાથે થયા હતા. વર્ષ 2022 માં મુસ્લિમ રિવાજ મુજબ આ યુવતીના લગ્ન થયા બાદ તે તેના સાસરે રહેવા ગઈ હતી. લગ્નના બે દિવસ બાદ તેના પતિના ફોન ઉપર એક છોકરીનો ફોન આવ્યો હતો. જે બાબતે યુવતીએ તેના પતિને પૂછતા પતિ ઉશ્કેરાઈ ગયો હતો અને ગાળો બોલવા લાગ્યો હતો. બાદમાં જાણવા મળ્યું કે તેના પતિને લગ્ન પહેલેથી જ તે છોકરી સાથે પ્રેમ સંબંધ હતો. જે બાબતે યુવતીએ તેની સાસુને ફરિયાદ કરતા સાસુએ કહ્યું કે ‘મારો દીકરો દિવસમાં 10 છોકરીઓ સાથે સૂતો હોય પણ રાત્રે તો તારી પાસે આવે છે ને’ તેમ કહી તેમના દીકરાનું ઉપરાણું લઇ યુવતી સાથે ઝઘડો કરવા લાગ્યા હતા.

આ પણ વાંચો: તબીબે બાળકીને કાર નીચે કચડી નાંખી, મોત થયું

થોડા દિવસ બાદ યુવતીની નણંદ કે જે સાસરીમાંથી રિસાઈને આવી હતી તે તમામ લોકોએ ભેગા મળી ઘરકામ બાબતે યુવતી સાથે બબાલ કરી તેને માર્યો હતો અને દહેજમાં કંઈ લાવી નથી અમે અમારી દીકરીઓને કેટલું બધું આપ્યું છે તેમ કહી દસ લાખ રૂપિયા લઈ આવવા માંગણી કરી હતી.

યુવતીએ દહેજ લાવવાની ના પાડતા તેનો પતિ આવેશમાં આવી ગયો હતો અને માર મારવા લાગ્યો હતો. જેમાં તેની નણંદ પણ સામેલ હતી અને બંને હાથ નણંદે પકડી રાખતા તેના પતિએ તેને માર મારી મૌખિક ત્રણ વાર તલાક તલાક તલાક બોલીને ઘરમાંથી કાઢી મૂકી હતી.

સમગ્ર બાબતને લઈને યુવતીના પતિએ અમારા વિરુદ્ધ ફરિયાદ કરીશ તો જાનથી મારી નાખીશ તેવી ધમકી પણ આપી હતી. પરંતુ યુવતીએ હિંમત એક કરીને સમગ્ર બાબતને લઈને ફરિયાદ આપતા પોલીસે ગુનો નોધી તપાસ શરૂ કરી છે.