ભાવનગરએક કલાક પહેલા
- કૉપી લિંક
સેન્ટ્રલ સોલ્ટ એન્ડ મરીન કેમિકલ્સ રિસર્ચ ઇન્સ્ટિટયૂટ ભાવનગર ખાતે આવતીકાલ તા.10થી 14 એપ્રિલ દરમિયાન “વન વીક વન લેબ” કાર્યક્રમનો મહાનુભાવોના હસ્તે પ્રારંભ થશે, આ અંતર્ગત પત્રકાર પરિષદ યોજી માહિતી આપી હતી.
સંશોધન, દરિયાઈ સંસાધનો પર ધ્યાન કેન્દ્રિત
CSIR-CSMCRI દ્વારા સપ્તાહ અભિયાનમાં ‘વન-વીક-વન-લેબ’નું આયોજન કરી રહ્યું છે.CSMCRIનું સંશોધન દરિયાઈ સંસાધનો પર ધ્યાન કેન્દ્રિત કરે છે, જેમાં સંશોધન અને પરિવર્તનનો સમાવેશ થાય છે. તેના મુખ્ય સંશોધન હિતોમાં મીઠું અને દરિયાઈ રસાયણશાસ્ત્ર, મેમ્બ્રેન-આધારિત ડિસેલિનેશન અને વિભાજન, દરિયાઈ કાર્બનિક રસાયણો માટે ઉત્પ્રેરક, ચોક્કસ અકાર્બનિક પદાર્થો, નવીનીકરણીય ઉર્જા, વેસ્ટ-ટુ-વેલ્થ પ્રક્રિયાઓ, સીવીડ, સૂક્ષ્મ શેવાળ અને હેલોફાઈટ્સનો મોલેક્યુલર-બાયોલોજી અને બાયોટેકનોલોજી, ખારા કચરો વ્યવસ્થાપન, પર્યાવરણીય પ્રભાવનું મૂલ્યાંકન તેમજ સમાજ અને રાષ્ટ્રના કલ્યાણ માટે માનવ સંસાધનોના નિર્માણનો સમાવેશ થાય છે.
પાંચ દિવસ અનેક કાર્યક્રમોનું આયોજન
એક સપ્તાહ દરમિયાન દરરોજ વિવિધ કાર્યક્રમોનું આયોજન કરવામાં આવશે, સંસ્થાનો સ્થાપના દિવસ 10 એપ્રિલ સોમવારના રોજ ઉજવવામાં આવશે, જેમાં સંસ્થાની સંશોધન પ્રવૃત્તિઓ પર મોડેલ પ્રદર્શન અને પોસ્ટર પ્રદર્શનનો સમાવેશ થાય છે. આ દિવસે આમંત્રિત વિદ્યાર્થીઓ અને અન્ય તમામ રસ ધરાવતા વ્યક્તિઓ માટે સંસ્થાના સંશોધન અને વિકાસને જોવા માટે ખુલ્લો રહેશે.
સ્ટાર્ટ-અપ અને ઉદ્યોગ મીટ બીજા દિવસે, 11ને મંગળવારે પ્રસ્તાવિત છે; જેમાં CSIR-CSMCRI વૈજ્ઞાનિકો, ઉદ્યોગના લોકો અને સ્ટાર્ટ-અપ્સ ઉધોગ/સમાજની સેવામાં CSIRCSMCRI સંશોધન આઉટપુટ પર આધારિત બિઝનેસ તકો અને તેના પર ચર્ચા વિચારણા કરવામા આવશે.
12 એપ્રિલ બુધવારના રોજ કૌશલ્ય વિકાસને સમર્પિત કરવામાં આવશે જેમાં કોલેજના વિધાર્થીઓને સીવીડની ખેતી અને પ્રક્રિયા, પાણી ગાળણ એકમો, સૌર ખારાશની કામગીરી વગેરે જેવા વિવિધ ક્ષેત્રોમાં CSIR-CSMCRI સંશોધનનું નિપુણતા પૂર્વક પ્રાયોગિક એકસપોઝર આપવામાં આવશે.
13 એપ્રિલ ગુરુવાર ચોથા દિવસે CSIR-CSMCRI કેમ્પસમાં વિજ્ઞાન પ્રદર્શન અને આઉટરીય પ્રવૃતિઓનુ આયોજન કરવામાં આવશે, જેમાં વૈજ્ઞાનિક-વિદ્યાર્થીઓ વચ્ચે ચર્ચા વિચારણા, વિજ્ઞાન ઉત્સાહીઓની ભાગીદારી અને પ્રખ્યાત વ્યક્તિઓ દ્વારા લોકપ્રિય વિજ્ઞાન પ્રવચનો મુખ્ય આકર્ષણ રહેશે.
છેલ્લા દિવસે; 14 એપ્રિલ શુક્રવારના રોજ એક ભવ્ય કાર્યક્રમનું આયોજન કરવામાં આવ્યું છે જેમાં ભાવનગર શહેરના મેયર, જિલ્લા કલેક્ટર, મ્યુનિસિપલ કમિશનર, ડિવિઝનલ રેલ્વે મેનેજર, એમ.કે.ભાવનગર યુનિવર્સિટીના કુલપતિ અને રજીસ્ટ્રાર, ડીન સરકારી મેડિકલ કોલેજ ભાવનગર, નામાંકિત તબીબો સાથે ભાવનગરના અન્ય ઉચ્ચ અધિકારીઓ સામેલ થશે. સંસ્થાના વરિષ્ઠ વૈજ્ઞાનિક અને પીઆરઓ ડૉ. કાંતિ ભૂષણ પાંડેએ જણાવ્યું કે સાંસદ ભારતીબેન શિયાળ અને પૂર્વ સાંસદ રાજેન્દ્રસિંહ રાણા તથા મહાનુભાવો દ્વારા ‘વન-વીક-વન-લેબ’ કાર્યક્રમનું ઉદ્ઘાટન કરવામાં આવશે.
સમાજ-ઉદ્યોગોને સુધારવા આયોજન ડૉ. કન્નન શ્રીનિવાસને, ડાયરેક્ટર, CSMCRIએ જણાવ્યું હતું કે આ સંસ્થા તેની વૈજ્ઞાનિક અને તકનીકી નવીનતાઓ દ્વારા સમાજ અને ઉદ્યોગોના લાભ માટે યોગદાન આપવા માટે ઉત્સાહી છે. અમને ખાતરી છે કે લોકોને CSMCRI અને CSIR વિશે વધુ જાણવા માટે આ ઇવેન્ટ રસપ્રદ અને ઉપયોગી લાગશે. CSMCRI, ભાવનગર ખાતે 10-14 એપ્રિલ દરમિયાન ‘વન-વીકવન-લેબ’ના આયોજનમાં સમાજ/ઉદ્યોગોને સુધારવામાં અમારા ભાગ બનવા માટે અમે આપ સૌનું સ્વાગત કરીએ છીએ.
